Mga minahal nga katawhan sa Diyos,
Atong huptan paghugot ang atong pagsunod kang Kristo Hesus ug sa mga panudlo ug pulong sa Diyos Amahan pinaagi sa Iyang Anak ug mga Apostoles, Santos ug Santos ug Birheng Maria.
Taliwala niining tanan, angay natong lawom nga masayran ug sabton ang mga butang nga atong nasinati karon aron dili kita mahitumpawak sa kaalautan.
Ang Diyos nagpahibalo kanato pinaagi sa Iyang anak nga mao ang Ginoong Hesukristo nga modangat sa kalibutan ang daghang kalisdanan, kagutom, giyera, kalisod, panagbangi sa pamilya, ug mosanay ang kadautan sa katawhan unya mobugnaw ang pagtoo sa katawhan.
Nagpahimumdum Siya nga motungha ang mga mini nga propeta nga magpahisalaag sa katawhan bisan pa sa mga pinili.
Ang atong Ginoong Jesus nag ingon, “Pagbantay kamo sa mga mini nga propeta nga moanha kaninyo nga managsapot sa pagka-karnero apan diay sa sulod nila sila mga Lobo nga manunukob. ( Mateo 24:11 & 7:15 KJV ).
Niining panahon sa nanagsapaw nga mga kalisdanan, kagubot, kagutom ug panag-agulo sa Katawhan himoong kahigayunan kini sa mga manunukob aron gamiton ang ngalan Diyos ug ang mga Balaang Ebanghelyo alang sa ilang kahakug uban ang pagpahisalaag sa Katawhan.
Daghan karon ang nanaglibot-suroy dala ang ngalan ug pulong sa Diyos. Haniti nga mamumulong, haniti nga magsasangyaw ug manggialamon nga tigpatoo. Nanagsapot sila sa mga sapot sama sa mga apostoles ug nanimuyo pahaum sa katawhan sa Amahan.
Apan kanunay natong matngunan ang pahimangno sa Diyos Amahan pinaagi sa Iyang Anak.
Busa igsoon, ayaw palingla, lig-ona ang imong kaugalingon ug kanunayng puy-an ang katarong ug pagbulut-an sa Diyos sa Kabuhatan ug Labing Gamhanan, tinubdan sa Kinabuhi ug Kaluwasan. Sa ingon niini atong maalim ang panag-agulo sa kabuhatan ug sa atong kaugalingon (Romans 8:20-23 KJV).
July 8, 2025
