Ang Kalinaw diha kang Kristo
Si Kristo mao ang tinubdan sa kalinaw.
Ug agig pamatuod niini sa unang higayon sa pagpakita Niya sa Iyang mga apostles human siya nabanhaw, ang unang pulong nga migawas sa Iyang baba mao ang pulong “Kalinaw”. “Ang kalinaw maanaa kaninyo”. Ug ang pagbalik sa atong kaugalingon ngadto sa Ginoo maoy kalinaw alang sa tibuok kalibutan ug kini himaya atubangan sa Dios.
Apan daghan tawo nga kalibutanon wala makatugkad sa Kalinaw ug sa pagkab-ot niini. Usa niini ang giyera aron sa pagsakop, pagpildi ug pagpuo, ug ang pagpanimalos. Anaa usab ang kalinaw nga pagkontrola sa uban, nga dili na patingugon ang uban ug wala nay pag-abli sa mga pagsaway. Kay nagtoo nga ang kusog ug paglupig sa kaatbang kini mao ang kalinaw.
Apan ang matood tapulahaw lang ug subo lang kay kining gituuhan nga kalinaw mao pa ang magsugnod aron mosila-ob ang kagubot. Niining tanan motunhay o nagtunhay ang kalisod, krimen, sakit, pagpangyatak sa katunhod, pag-abuso sa kinaiyahan, ug pag abuso sa gahum ug bahandi. Dili lang pisikal nga kadaot kundi apil emosyonal ug mental nga aspeto ang gusbat.
Miturok usab ang sosyal, political ug relihiyosong kagubot sa kagustuhang ang pagbuot sa matag pikas nga bahin lang ang maoy nag-angkon sa matood. Gawas pa nga gigamit ang relihiyon alang sa interes ekonomkinahon ug politikanhon.
Bisan pa niana, si Kristo naghatag kanato ug kalinaw sa kahiladman nga labaw pa sa kalinaw nga gitanyag sa kalibutan aron pamati-on ug sundon nato uban sa pagtoo.
Si Kristo miingon subay sa sinulat ni San Juan 14:27, “kaninyo ibilin ko ang kalinaw, kaninyo ihatag ko ang akong kalinaw, hatagan ko kamo niini dili sama sa hinatagan sa kalibutan”.
Ug gi awhag kita nga himoon nato ang tinod-anay nga paghinulsol. Kay ang paghinulsol, usa kini ka saad nga malingkawas kita sa mga dautang gawi ug mga kasub-anan sa sala. Ug luyo sa mga kalisdanan, bulahan kita kay aduna kitay Dios nga kadangpan.
Dugang pa nga pahimangno ni Hesus diha sa sinulat ni San Juan 16:33, “Gisulti ko kini kaninyo aron nga dinhi kanako makabaton kamog kalinaw, dinhi sa kalibutan aduna kamoy kagul-anan, apan sumalig kamo, gidaog ko na ang kalibutan.”
Karong adlawa gisaulog ang International Peace Day ug ang atong nasud nag-obserba usab niining bulan sa Septembre sa Bulan sa Kalinaw, ug kagahapong adlawa petsa 20 ang tibuok kalibutan naghiusa usab alang sa pag-lihok ug pag-awhag alang sa limpyong kadagatan tungod kay International Coastal Clean up Day man usab.
Kini taliwala sa daghang mga panghitabo sa kalibutan sama sa padayon ang kagubot ug pagmasaker sa mga Palestino buhat sa goberno sa Israel; anaa ang mga kaguliyang tungod sa pagprotesta sa mga batan-on batok sa korapsyon sa Indonesia, Nepal ug East Timor. Karong adlawa sa atong nasud, daghan usab ang nag-protesta batok sa dayag ug labihan na nga korapsyon samtang daghan sa katawhan ang gigutom.
Kining tanan mga kasamok apan ang buot ipasabot sa Diyos nga ang Iyang gugma ngadto sa tanan labaw na sa mga gilupigan ug nanagpadayong gisaulog ang Iyang katarong ug kabubut-on sa pagkapatas mao ang atong buhatong basehan sa pagsukod sa Kalinaw.
Ang Kalinaw sa Diyos mao ang pagbuhat sa Iyang kabubut-on. Dili kita magbakak, dili kita magpasulabi sa gahum ug bahandi, dili kita magbuhat ug dautan, dili kita mangawat, dili kita magpasakit sa isig kaingon hinonoa atong saulugon ug ipabati ang gugma ngadto sa usag-usa, ngadto sa kinaiyahan ug sa Diyos labaw sa tanan.
Dalaygon ang Dios uban sa iyang kalinaw.
Fr Alejandro V. Notarte, Jr
San Antonio de Padua church
Osmeña, Tagbina, Surigao del Sur
September 21, 2025
