PAMALANDONG SA SEMANA SANTA
Bishop Jaime
Ang pagsaulog sa Semana Santa maoy usa ka dakung higayon, diin ang matag usa ka tawo angayang mahinumdom sa pag ila, pagtahud ug pagpasalamat sa DIOS nga anaa sa langit.
DIOS nga maoy nagmugna sa tanan sa tibuok kalibutan ug kabuhatan. DIOS nga maoy naghatag ug tag iya sa kinabuhi. DIOS nga maoy nag andam ug luna sa langit alang sa mga pinili niyang katawhan. DIOS nga mianhi sa kalibutan, nagpakatawo aron makig uban kanatong iyang mga katawhan. Ug labaw sa tanan ang DIOS nga tungod sa iyang dakung gugma kanato, gidawat ang pagpasakit, gisakit siya tungod sa atong pagkamalapason, pagkadautan ug pagkamakasasala. Nagpas-an sa Cruz sa kasakitan, gidughang, gitamay, ug gibiay-biay. gipurong-purongan sa tunok sa atong pagkamakasasala. DIOS nga nagpalansang ug namatay sa Cruz aron malukat ang gihigugma niyang katawhan sa Sala.
Ako nanghinaut nga pinaagi sa pagsaulog nato niining Semana Santa sa pag antos ug sakripisyo ug pagkamatay ni Ginoong Jesus sa Cruz atong mabatunan ang usa ka kalag ug kasingkasing Diosnon, mapainobsanon ug mahigugmaon.
Ug sa kapusan hinaut nga ang atong Dios nga mao usab ang Dios ni Abraham ug Isaac, padayon nga manalangin sa tibuok katawhan ug kalibutan.
April 17, 2025
–
Bishop Jaime
Diocesan Bishop, Bukidnon
Administrator of the Sacred Heart of Jesus
San Fernando, Bukidnon
|
|
|
|---|---|
|
|
|
