May 2, 2025
Panultihon 21:3
“Mas ikalipay sa GINOO ang husto ug matarong nga binuhatan sa tawo kaysa iyang mga halad.”
Mga Pinalanggang Anak sa Diyos,
Bag-uhay pa lamang nato gisaulog ang Quaresma o mga adlaw sa kasakit ug sakripisyo ni HesuKristo alang sa kalibutan ug mga katawhan. Kini natapos sa adlaw sa pagka-banhaw nga diin naghatag kanatong katawhan sa paglaum ug gasa sa Kinabuhi.
Hinaut nga ang ispiritu sa Semana Santa ug Domingo sa Kabanhawan nagpahinumdom kanato sa paghinulsol ug pagbuhat sa husto ug matarong. Kini nga kahigayunan nag-awhag kanato labi na kay sa maka-usa pa ato na usab salmutan ang usa ka mahinungdanon nga katungod ug responsibilidad sa umaabot nga Mayo 12, 2025.
Apan sa taas na nga panahon, kining maong demokratikanhong proseso nabulingan ug naabuso nga gani ang mga katawhan daw nawad-an na sa pagsalig sa kaligdong niini samtang ang pipila nga naghupot sa ekonomikanhon ug politikanhong gahum mas naglungtad. Kini gipalig-on sa pagtunhay sa labihan ug kuyanap nga kurapsyon, inekwalidad ug kagutom; kuyanap nga daw nahimo nang kultura nga pagpamalit ug pagpamaligya sa boto; pagkontrola sa mga insititusyong politikanhon ug katilingbanon ug mga serbisyo pinaagi sa mga dinastiya; pagpadayon sa kultura sa kagubot, pagkabahin-bahin sa katawhan ug inhustisya; ug ang padayong pagbungkag sa kinaiyahan aron nga magtigum ug daghang bahandi ug gahum.
Gani, subay sa mga pagtoon sa mga eksperto nag-una nga panginahanglan sa katawhan nga angayang tagaag pagtagad mao ang desenting panarbaho, kaseguruhan sa pagkaon, tawhanong katungod, kinaiyahan ug dekalidad nga serbisyo publiko; samatang nagtaas usab ang ihap sa mga gigutom; ug ang mga magpapili sa lain-laing mga distrito, probinsya ug syudad managparentehanay o ang gitawag nga gikan sa mga dinastiya.
Isip mga anak sa Diyos, kita gipiyal sa matag-usa alang sa usag-usa. Gilauman ug gisugo kita nga puy-an ang katarong ug sa kanunay magbuhat alang sa KAAYUHAN SA TANAN, ALANG SA TANAN. Ug ang kadaghanan sa biktima ug nag-antos sa labihan niining maong pagpahimulos ug pagsupak sa pagbuhat alang sa KAAYUHAN SA TANAN mao ang mga kabus ug mga hiniklin sa katilingban. Ug ang mga gitugyanan sa responsibilidad nga mangalagad mao na hinoon ang naghari.
Ang kamatayon ni Kristo sa krus dili lamang kini tungod sa mga panagna, apan kini mas tungod kay natandog ang mga anaa sa gahum niadtong panahona sa Iyang pagsangyaw ug pagbarug sa katarong ug kaangayan nga ilingkawas ang mga ulipon ug yanong katawhan. Iyang gibarugan ang katungod sa mga kabus ug mga ulipon, nga diin nahimong bugti niini mao ang Iyang kamatayon.
Busa, mahinungdanon isip mga Anak sa Diyos nga ang umaabot nga piniliay (nasyonal, lokal ug party list) 2025 dakong kahigayunan ug tipik sa mga pamaagi usab alang sa pag-umol og mga positiibong kabag-uhan sa mga komunidad nga atong gipuy-an ug katumanan sa mga panawagan alang sa sakto ug matinud-anong serbisyo ug pagpamuno. Balaan kini nga kaakuhan ngadto sa nasud ug katilingban isip mga Anak sa Diyos. Kung atong huptan ang gugma sa Diyos ug iyang mga sugo sa panaghiusa, panagsinabtanay ug pagtinabangay sa kasakit ug kalipay, molungtad ang hustisya ug kaangayan ug dili mabungkag ang mga relasyon tungod sa politika nga wala nag-silbi sa KAAYUHAN SA TANAN.
Ang Balaang Kasulatan nagapamatuod nga ang tanan anaa sa pagbulut-an sa Diyos pinaagi ni Ginoong Hesukristo, bisan pa ang pagbulut-an sa Kagamhanan (Colosas 1:16, Salmo 22:28). Busa ang Simbahan may dakung katungdanan sa paghatag ug mga pahinumdom, pagtudlo ug mga giya alang sa mga magpapili ug alang sa pagkab-ot ug mga desisyon sa mga botante. Taliwala sa tanang panagbingkil, kasamok ug pagkabahin-bahin tungod sa eleksyon, ang Simbahan magapabilin sa pagbarug sa Hustisya ug Kaangayan nga gitudlo sa atong Ginoong Hesukristo. Ug tungod kay kita mga tumotoo, atong puy-an ug himoong buhi kini nga pagtoo og Siya magauban kanunay kanato.
Aduna kitay balaanong responsibilidad ngadto sa atong nasud ug sa mga umaabot pang henerasyong Filipino. Angay lang nga sa umaabot nga Mayo 12, 2025 mosalmot kita. Mag-ampo kita sa hapsay, luwas, ligdong, sihag ug matinud-anong proseso sa piniliay. Sundon nga puno sa respeto ang gitakda nga patakaran sa mga tigdumala sa piniliay (COMELEC) ug sa gawasnon nga paghukom, atong botaran ang anaa sa atong dughan ug ang atong mga napamatud-an na nga matood nga alagad sa Diyos, sa Katawhan, sa Katilingban ug mainampingon sa Kinaiyahan ug dili ulipon sa kalibutanong kaulag sa gahum ug bahandi. Ayaw batoni ang kahadlok o kahangawa kay ang Diyos modasig ug mohatag kanato sa Iyang Kalinaw. Matud pa sa Amos 5:24: “Patunhaya hinuon ang hustisya ug ang katarong sama sa suba nga nagdagayday ug dili gayod mohubas”.
Atong HINUMDUMAN nga ang atong pagsalmot sa Piniliay 2025, “alang sa Diyos, Kabuhatan ug Katilingban dili sa mga politician”- ALANG SA KAAYUHAN SA TANAN. Ug ang atong pagpili imahe kini sa atong pagkatawo, takos ba kita tawgong Anak sa Diyos?
Ang Labaw nga Makagagahum magapanalangin kanato sa kanunay .
Sa ngalan sa Diyos nga Amahan, Anak ug Ispiritu Santo ingon man sa Birheng Maria. Amen. Alleluia.