Mga minamahal na mamamayan, mga pinuno ng komunidad, at mga tagapagtaguyod ng katotohanan,
Tayo ay nahaharap sa napakakomplikadong kalagayan sa mundo at bansa na kung saan ang ating mga aksyon ay hindi lamang nakakaapekto sa ating kapwa, kundi pati na rin sa mundong ibinigay sa atin, at sa ating tungkulin sa harap ng Maykapal.
Kinikilala natin ang isang di-mapaghihiwalay na katotohanan: Ang Katiyakan ng Karapatang Pantao at Kalinga sa Sangnilikha ay Katarungan sa Diyos.
Ang bawat tao ay nilikha na may di-matatawarang dignidad. Ang pagtiyak na ang bawat Pilipino ay may karapatan sa buhay, kalayaan, at hustisya ay hindi lamang batas ng tao; ito ay utos ng langit. Subalit, ang pangako ng katarungan ay patuloy na hinahamon ng dalawang malalaking banta:
– Ang nakamamatay na epekto ng pagkasira ng kalikasan, na nagdudulot ng pinsala sa kabuhayan, kalusugan, at mga komunidad, at
– Ang kanser ng korapsyon sa gobyerno at lipunan, na nagpapahintulot sa pang-aabuso at nagpapahina sa mga institusyon na dapat sana’y nagtatanggol sa atin’ at kawalang-pananagutan..
Ang pagkakait ng karapatang pantao, kasabay ng pagwasak sa kalikasan, ay ang pinakamalaking kawalang-katarungan. Ang ating mga bundok, karagatan, at kagubatan ay hindi lamang mga pinagkukunan; sila ay isang sagradong mana. Ang pagwasak sa kalikasan ay hindi lamang pagpapabaya sa ating kinabukasan—ito ay paglapastangan sa obra maestra ng Sangnilikha. Kapag sinisiguro natin ang karapatan ng biktima at inaalagaan ang ating kapaligiran, at kapag nilalabanan natin at itinakwil ang kultura ng korapsyon, tinutupad natin ang pinakamataas na porma ng katarungan—ang paglilingkod sa Diyos sa pamamagitan ng paglilingkod sa Kanyang mga nilikha.
Nanawagan Tayo
Sa Gobyerno: Sugpuin ang korapsyon nang walang pinipili at ipatupad nang buong puso ang mga batas na nagtatanggol sa Karapatang Pantao at lalo na sa kalikasan laban sa pagkasira.Panagutin ang mga sangkot at gawing dekalidad ang serbisyo publiko.
Sa Simbahan at Komunidad: Gamitin ang ating impluwensya upang turuan ang lahat tungkol sa koneksyon ng pananagutan, ekolohiya, at espiritwalidad. Pangunahan ang mga aksyong pangkalikasan at maging aktibo sa pagususlong ng mga reporma sa mga sangay ng pamahalaan.
Sa Bawat Mamamayan: Simulan ang pagbabago sa ating sariling buhay. Maging mapagbantay laban sa korapsyon, at maging boses ng mga walang boses at ng kalikasan. Lumahok sa mga aksyong pangkalikasan at katuwirang panlipunan.
Magkaisa tayo upang itatag ang isang lipunan kung saan ang bawat tao ay yumayabong, ang bawat bahagi ng Sangnilikha ay iginagalang, at ang katiyakan ng katarungan ay nararamdaman ng lahat. Ito ang ating misyon; ito ang ating pananagutan.
Maraming Salamat at Pagpalain Tayo ng Diyos.
Filipino Katoliko
77th International Human Rights Day
December 10, 2025